أخذت ثومه تتبرم منذ لقاء والدة زوجها ومعايرتها لها أنه لولاها كانت قد باتت بالشوارع وأصبح طفلها لقيطًا مثل وردة عزمت أمرها على الذهاب إلى هارون شقيق نادين الذي كانت تعرفه قبل معرفتها بزيان كصديق تمنى كثيرا المساس والفتك بها ولكنها في كل مرة كانت ترفض وتخشى منه ولما علم برغبة زيان في الارتباط بشقيقته وضع ثومه في طريقهم للتفريق بينهم مقابل حفنة من المال بالرغم من علمه أنها مرفوضة من قبل غزال بدون ذكر أسباب ومع ذلك تحدثت ثومه مع زيان بدون إخباره أنه شقيق نادين أيضًا زيان يعلم أن لنادين شقيق ولكنها منفصلة عنه بعد طلاق والدتها من والدها
واختيارها العيش مع والدها عرضت عليه فكرة تراقصت في مخيلتها وكان رد زيان كالآتي: تفتكرى يا ثومه أبويا ممكن يوافق عليه ولا هيعصلج ويقول لسه صغيرة؟
مصمصت ثومه شفتيها ليستطرد زيان قائلًا: وبعدين الراجل ده أهله كويسين يعني؟ أصل أبويا أكيد هيسأل عليه.
ابتسمت ثومه بخبث ولم تشأ أن تسرد له الحقيقة حتى يتسنى لها أن تعلم لما غزال لم يوافق على نادين ورفضها وبشدة حيث أن الشخص الذي تتحدث عنه ثومه هو هارون شقيق نادين فأردفت بكذب قائلة: اطمن ده أبوه وأمه أولاد ناس أوى وعايشين بره كمان هو بس اللي مش بتاع جواز بيحب يسرح بالبنات.
ثم غمزته بوقاحة قائلة: ووردة حلوة وهتعجبه.
لوى شفتيه بامتعاض قائلًا: لا بقولك ايه حوار حلوة وتعجبه ده ميأكلش معايا، ده لازم يتجوزها ويلحس مخها ويخليها تكتب له كل اللي تملكه.
وتابع بشر قائلًا: واحنا ناخد النص.
هزت ثومه رأسها متفهمة ولكن اعترض زيان قائلًا: لا نص ايه أحنا ناخده كله وهو كفاية عليه حلاوتها لما يزهق منها يطلقها.
ثم أردف بخبث قائلًا: مش بتقولي مش محتاج وبعدين لازم ناخد عليه ورقة الأول.
أطاعته ثومه وذهبت إلى هارون
رحب بها هارون قائلًا: يا مرحب يا مرحب ايه القمر ده يا ثومه؟
يا بنت اللذين هو الحمل مغيركيش لسه حلوة.
تعالت ضحكتها الرقيعه ليغمزها بوقاحة قائلًا: ايه أنتِ غيرتي رأيك ولا ايه مش بتحبي الحلال؟
رفعت ثومه كتفيها بغرور قائلة: كان نفسي الحلال ده يبقى معاك بس أنت اللي غاوى حرام مش عارفة واستفدت ايه ليلة واحدة مش كفاية ليك.
ثم ذكرته بما فعلته من أجله قائلة: أنا عملت اللي عليا زمان ونجحت إني أفرق بين زيان ونادين عليك أنت بقي ترد الجميل ايه رأيك في ألف ليلة وليلة؟
تعالت ضحكاته قائلًا: ألف ليلة وليلة!
ليه أنتِ فاكراني هارون الرشيد يا ثومه ودي مين بقي الملكة اللي هتستحمل معايا ألف ليلة وليلة؟
نظرت له بتفاخر ليرمقها بازدراء قائلًا: أكيد مش أنتِ.
مطت ثومه شفتيها ليتابع حديثه قائلًا: أنتِ خلاص روحتى لصاحب نصيبك وأنا مليش في المستعمل أنا بحب الورق السوليفان.
ثم رفع أكتافه بلا مبالاه قائلًا: ومليش في الجواز المهم أنت جاية ليه؟
رفعت حاجبيها بغيظ قائلة: بس أنا جايلك في الحلال والحلال اللي جيباه المرة دي يستحق بت زى القمر وردة وهي وردة فعلا.
ليجحظ هارون بعينه وهي تستطرد قائلة: أخت جوزي زيان تقدر تقول مش أخته.
عقد ما بين حاجبيه ليستدرجها قائلًا: بس ازاي أخته ومش أخته ؟
وبعدين يا ثومه من امتى وأنت بتشتغلي خاطبة؟
ثم ضحك بسخرية قائلًا: ولما هي قمر يا ستي ليه مش متجوزة ولا اتخطبت لحد دلوقتي ليه؟
ابتسمت ثومه بسخرية قائلة: هقولك البت دي لاقاها حمايا في سلة الورد في الأتوبيس كانت لسه حتة لحمة حمرا.
تركزت كافة حواسه معها وهي تسرد بقيه حوارها قائلة: حمايا وحماتي أخدوها ربوها و بقوا يقطعوا من قوت جوزى وأخوه علشانها.
استهزأ قائلًا: مش حماكي ده عنده شركة مقاولات وجوزك وأخوه بيشتغلوا معاه.
هزت رأسها ليسألها قائلًا:
ايه حكاية الجنايني دي أنتِ يا بت يا ثومه بتاخدي حبوب هلوسة؟
واستطرد بخبث قائلًا: ولا سي زيان بيسيقكي من اللي بيشرب منه وبعدين أنا مالى بالفيلم الهندي ده كله؟
زفرت ثومه بحنق ليتابع هو قائلًا: أنا اللي عليا لو محتاجة فلوس أجبلك غير كده مليش فيه وبعدين لا أهلي هيوافقوا عليها ولا عم غزال بتاعك ده؟
لوت شفتيها بامتعاض قائلة: مش عايزة فلوس.
اندهش لما تتلفظه لتمكر هي قائلة: رغم ان جايلك علشان تجبلي الفلوس لما تتجوز البت دي وتخليها تكتب لك كل حاجه باسمك أصل كل الهلومة دي بإسمها.
تحدث باستهجان قائلًا:
ولما الهلومة دي باسمها جريتي اتجوزتيه ليه؟
اوعي تقوليلي إنك عملتي كده علشاني!
لوت شفتيها بضيق ليتابع هو قائلًا: أصل اللي زيك ميعرفش يعمل حاجة لله في لله، وبعدين ايه اللي يخليها تكتب لي وهي عارفة إن معايا وبعدين يا بنتي أبوها مش هيوافق.
ابتسمت بخبث قائلة: مشروع جديد تحط فلوسها على فلوسك وبعدين تطلقها وترميها بعد طبعًا ما تكون استمتعت بيها.
رفع حاجبيه باندهاش من تخطيطها يحاول أن يفهمها أن هذا دون جدوى ولكنه تفاجئ من السبب الثاني لطلبها عندما قالت: أنا أخد الفلوس منك بس مش مساعدة لا، حقي.
حاجة كمان أنا نفسي تترفض علشان أفهم ايه سر رفض غزال لنادين أختك بنت الحسب والنسب.
ثم أخرجت من حقيبتها صورة لوردة والتي ما أن شاهدها تاه وشرد في ملامحها الجميلة وأخذ يفكر فيما قالته ثومه عنها ولكن تبقى السؤال هل سيطاوع ثومه فيما رسمته أم سيكون جيدًا ويغير من نفسه أم سيقلب الأوضاع ويطيح بالجميع في مقابل ما يسعي له، وترى من يكون ذلك الشخص البغيض الذي تحدثت معه ثومه وهل هو بغيض إلى هذا الحد معروف الكائنات مثله إذا أرادوا ثومه أو غيرها سيأخذونها مهما حدث.
وضعت الطعام على المائدة وأنتظرت وصوله من السفر حيث كان غزال في مأمورية تابعة لشركة المقاولات هذا أمر اعتادت عليه منذ سنوات ولكن هذه المرة خفق قلبها لعدة مرات متتالية فهي تعلم أنه ضعيف في القياده نظرًا لضعف نظره والسكر الذي أصابه منذ سنوات وهذا يقلقها أكثر عليه وفي غضون ساعة منذ لحظة اتصاله بها يعلمها أنه على وصول كانت في قمة قلقها وجائت وردة من الجامعة ولم تجده فقط وجدت نظرات القلق في أعين بهيرة لتتجه نحوها قائلة: اهدي يا ماما أنا هاتصل بيه ونطمن.
وبالفعل قامت وردة بمهاتفته ليرد عليها زيان والتي تفاجئت من وجوده مع والدها خاصة بعد إخبارها أنه تم طرد شقيقها من العمل أنتفضت وهو يتحدث لها باستهزاء قائلًا: أهلًا يا ست وردة طبعا مستغربة إني برد عليكي معلش ما أنتِ مسكينة برده ومش عارفة اللي فيها.
خشت وردة أن يكون أصاب والدها مكروه ليتابع زيان حديثه قائلًا: متعرفيش أن يوم ما الأب بيقول أه بيدور على رجالة.
هتفت وردة برعب وخوف قائلة: طب وماله أنت عارف يا زيان إن كل ده مش بيهمني أنا اللي يهمني دلوقتي بابا فين واتأخر ليه.
وتابعت يتعالى خوفها قائلة:
اوعى تقول جرى له حاجة علشان خاطرى.
هنا شهقت بهيرة من الحوار ووضعت يدها على صدرها كانت تعلم أن هذا القلق خلفه شيء وبالفعل تعرض غزال لحادث سير وما كان عليه إلا أن يتصل بزيان خوفًا على بهيرة ووردة.
هرعت وردة إلى المستشفى بعد أن أخذت العنوان من زيان وما إن وصلت إلى غرفته حتى استوقفها زيان قائلًا: استني هنا رايحة فين؟ هي وكالة من غير بواب؟
ترجته وردة كثيرًا ليقترب منها بخبث قائلًا: لو خايفة عليه وعايزة تدخليله تدخلي تتوسطي لينا يرجعنا الشغل يا إما أنت حرة.
أزاحته وردة ودلفت تركض إلى غزال وتحتضنه ليربت على ظهرها بحنو قائلًا: متخافيش يا وردة يا حبيبتي أنتِ عارفه بقي أبوكي عضمة كبيرة والسكر خلاني مش مركز.
أخذت تقبله من رأسه وتحمد ربها أنه بخير ليردف بضحكة قائلًا: كله من مربي الورد بتاعت أمك أنا هجيب سواق للسفريات دي.
مسحت وردة دموعها وابتسمت بخفوت قائلة: سواق ايه يا بابا ده أنت عندك رجلين ما شاء الله عليهم وبعدين ملكش بركة إلا هما.
اندهش غزال من تلميحها خاصة عندما ترجته قائلة: رجعهم يا بابا الشغل أكيد اللي حصل المرة اللي فاتت غلطة مش مقصوده.
علم غزال أن زيان أثر على وردة لتتفوه بهذا الحديث فرد بإصرار قائلًا: ملكيش دعوة بالكلام ده يا وردة دي حاجة بيني وبين اخواتك سيبيني أربيهم.
تنهدت وردة بقلة حيلة ليشير غزال نحو الباب بضيق قائلًا: مش معنى إني اتصلت بالزفت اللي بره أبقى محتاجله.
هزت رأسها بتفهم ثم سألته بتوجس قائلة: عملت ايه مع البشمهندس ابن صاحب المستشفى؟
ثم تابعت بخزي قائلة: يا ترى قبل اعتذارك عن اللي عملوه فيه زيان وناصر ولا لسه معصلج يارب يكون قبله.
تنهد غزال بتعب قائلًا: قبله ومقبلوش.
عقدت وردة ما بين حاجبيها ليوضح لها غزال قائلًا:
هو قالي سواء كان عملوا كده أو معملوش أنا كنت حابب أستقل بنفسي علشان أولادي بدأوا يكبروا ولازم يكون في شغل باسمي.
دلف في تلك اللحظة زيان وابتسم بشماتة قائلًا: متتصورش أنا فرحان قد ايه أهو ريح واستريح يا عم ده كان عينيه في الشركة.
نظر له غزال بغيظ ليكمل زيان قائلًا: وسبب شكلنا معاه أنه عايز يحسس الكل إنه الآمر الناهي.
زفرت وردة بحنق قائلة: طيب يا بابا شوف مهندس غيره أو هو يشوفلك أكيد معارفه كتير.
ثم تابعت قائلة: وبعدين أنت زمان كنت السبب في وقفته على رجليه دي ولا ايه؟
ابتسم غزال لذكاء وردة بعد وقوعه في الحيرة لتيسير أمور العمل ورد عليها قائلًا: تفتكري ممكن يرشحلي حد كويس طب يا ريت بس اعملي حسابك لو ده حصل أنتِ اللي هتباشري على شغل المهندس ده.
هزت رأسها بكل تأكيد قائلة: طبعًا وأهو فرصة أدرب في الشركة واحتمال أخليه يساعدني في مشروع التخرج.
و تابعت بسعادة قائلة: على فكرة يا بابا كله خير خير لينا وللمهندس الجديد.
تنهد غزال براحة ونظر بشماتة إلى زيان قائلًا: بإذن الله أنا متفائل خير يا وردتي يا وش الخير من يوم ما جيتي الدنيا.
تضايق زيان ليتابع غزال بشغف قائلًا:
المهم بقى خليهم يكتبولي على خروج فات أمك قلباها مناحه.
نظرت وردة إلى عيني غزال برجاء أن يتحدث برفق مع زيان فزفر ثم ربت على كتفيه قائلًا: يلا يا ابني اسندني.
أنهضه زيان وتوجه إلى باب الغرفة وتبعتهم وردة وعادوا إلى البيت.
قام ناصر بإسناده معه إلى غرفة نومه و تبعتهم بهيرة وثومه التي هبطت من الدور العلوى للتو وليس من ذي قبل فهي لم تحاول مواساة والدة زوجها في قلقها على زوجها بل بالعكس تعالت ضحكتها بسماجة وهي تنظر إلى وردة بخبث قائلة:
كل الوقت ده في المستشفى يا وردة ومعرفتيش توقعي دكتور حليوة زيك كده ايه عميوا عن الجمال ده كله؟
نظر الجميع إليها باشمئزاز حتى ناصر تضايق من أسلوبها بالرغم أنه كان استهزائًا بوردة التي لم يعترف بها يومًا كشقيقة أما عن زيان فقد قام بسحبها من ذراعها وصعد بها إلى شقتهم ليواليها بالأخبار والاتفاقات الجديدة بين وردة ووالده.
بعد دلوفهم للشقة الخاصة بهم وسرد زيان لما حدث ضر,بت ثومه على صدرها بغضب قائلة: يعني ايه يا زيان يعني كل اللي خططنا ليه طلع فشنك؟
هز زيان رأسه بضيق لتستطرد هي قائلة:
أنت متعرفش أنا عملت ايه علشان المهندس ده يغور.
ولا النهارده خليت صاحب الاستراحة يزود السكر في الشاي علشان يتحوج ليك.
هز زيان رأسه بيأس لتجز ثومه على أسنانها قائلة: لاااا مش كل اللي رسمته يبوظ ويجيبوا مهندس تاني يكبر الشغل والبت دي تدوس المكان.
ثم تابعت بإصرار قائلة: وزي ما كل مرة عملتها نعملها تاني وتالت ورابع.
وإن وضع الأمر بين يديها لا تأمن مكرها تلك الأفعى التي لا يمر من بين يديها حسنًا بل يمر كل ما هو بغيض وكريه إنها سامة وليست ثومه إنها جرثومة مسمومة.
أنتفض زيان كمن لدغته عقربة بالرغم من بغضه لوردة إلا أنه وجد من ثومه إنسانة تخطط لق,تل والده وخشي أن تدور به هو وشقيقه في يوم من الأيام فصرخ في وجهها قائلًا: ايه اللي بتقوليه ده يا ثومه يعني هتعملي ايه تاني ؟ مش كفايه خليتي العامل يزود السكر في كوباية الشاي.
ثم تابع وهو يجذبها من ذراعها يهتف بغضب قائلًا: هتعملي ايه تاني سيبيهم في حالهم بقى ده كويس اني كنت عامل حسابي أبقي قريب منه النهارده.
ابتسمت ثومه بخبث قائلة: متخافش أبوك ده على عيني وعلى راسي وأنا مش ناويه أذية حد المرة دي.
عقد ما بين حاجبيه لتجيبه على دهشته قائلة: بس بدل ما يكون المهندس الجديد من تبع المهندس القديم يبقى من تبعنا.
جحظ زيان بعينيه غير مستوعب لاقتراحها قائلًا: ازاي بقي يا فالحة وهو كلم بنفسه المهندس قدامي وقاله خلال أسبوع هيشوف ليه واحد كفء للموضوع ده.
ثم استطرد بسخرية قائلًا: هيبقى من تبعنا ازاي؟
